منتجـات خلصتها ! .. Empties ❤ (١)

السلام عليكم
بكمل سنه عن التدوين ! يالله قد ايش أمور كثيرررر صارتلي بهالسنه وخربطه
بس ادري مافيه شي يسعدني ويشغلني عن التفكير العبيط الا اني اسوي حاجه احبها ❤
راجعه بحماس للتدوين بجد ..
غيرت شويه بس شووويه بالمدونه وغيرت بتصويري نوعاً ما ان شاء الله تحبوه خبروني عاد ايش رأيكم
يهمني بجد اعرف أرائكم ❤
اليوم حاسه بطاقه عجيبه انا نفسي موعارفه وش سرها ههههه عاد قمت صورت المنتجات اللي مخلصتهم
كنت حاطتهم بصندوق وصورتهم اكثر من مره بس من هالطاقه صورتهم من جديد وعدلت الصور وجيت اكتب

هاه نبدأ ؟ بسم الله ..

من اليمين 

- Royal Beauty scrub
مقشر بالتوت مكتوب انه للوجه :/ بس أنا أستخدمه للجسم
التوت بالذات من بين الروايح الثانيه اللي جربتها تبقى ريحته أكثر وتقشيره يعتبر جيد
عموماً مع كل المقشرات عالاغلب استخدم قفازات بودي شوب احبها بس انتبهوا تفكرون بقوه

- كريم كاب
مقشر كاب احسه اشهر من نار على علم وكل البنات مرو عليه هههه
للأمانه انا اول كنت مستحقرته ماادري ليه واحس العالم بس طايحين فيه عالفاضي
بس بجد جميل بس مشكلته لازم اتأكد اني ارطب زين زين زين بعده ولا استخدمه اكثر من مره بالاسبوع
لاني عندي اكزيما تجي من وقت لوقت واحس تقشيره يعتبر قوي
بخصوص يبيض ! ماادري صراحه وش اكتب ماودي اعلق :)

- Botanics Scrub
آآآه الحب ديالي ❤ .. شي جممميل من جد يقشر ويرطب وتقشيره ناعم 
كان فيه عرض في بوتس تاخذين غرضين من الماركه والثالث مجاناً
اخذت التونر حقهم وهالمقشر وبلسم ، البلسم لاتجربونه سيئ المفروض بلسم يرطب لا يخلي الشعره كأنها متكسره وتعبانه مره كرهته
بس التونر كان جميل والمقشر اللي اخذته بس كذا طلع اجملهم باخذه مره ومرتين وثلاث ❤

شاور جل الاثنين من ايف روشيه

- عاليمين نفس مجموعتهم العاديه اللي دايم اخذ منها وتجي عليها عروض حلوه
بالرمان عادي ماعليه كشور جل بس ريحته مرره ماقدرت اتحملها
مع انها حلوه لماتشمينها من العلبه ! بس مجرد مااستخدمته مااتحمل ريحته بالشور ><

- الثاني مجموعه ثانيه بجوز الهند 
جممممممممميل ❤ وجد جد يفرق معاك انك غيرتي الشور جل حقك
غيرت نظرتي تماماً ! اول كنت اخذ الشور جل كريحه او انه بس طبي
لكن هذا جد جد يترك جسمك مرطب ونااااعم .. الاكيد كل ماخلص باخذلي ❤


نروح للشعر ؟ يالله ..

Bonawell hot oil treatment 

الاثنين من نفس الماركه واحد بالخوخ والثاني بالقمح
ليتني بس مااخذت الكبير من اللي بالخوخ :) سيئ جداً ويهبط الشعر بشكل موطبيعي
تعرفون لما تحسون شكل شعرك مزيت ؟ كيف طايح ؟ ايه بالضبط مع ان شعري مايكون مزيت
بس يلزق الشعر كذا بشكل غبي :/ حاولت جد جد احبه بكل الطرق بس ماقدرت ابد
وليته عاد يخلي ملمس شعري حلو او لاحظت تغير احسن مافيه ريحته ، ترا باقي بالعلبه مع اني حاولت بكل الطرق بس ماعاد اقدر اتحمله "لاتقولون لي لاتحطينه عالجذور لأني حطيته كذا :)"
كنت ماخذه الكبير لأني اتذكر استخدمت واحد من هالشركه وحبيته وعلى اساس هو نفسه للأسف

اخذت الثاني الصغيرون بالقمح
وطلع هو اللي كان عاجبني الحمد لله :$ ابشركم رجعت اخذت الكبير منه وتوبه ماعاد اتحمس بسرعه هههه
انا احب شعري يكون ملمسه حلو ولاينفش وفيه لمعه واهم شي يكون شكله كثيف مابي شي يخليه لازق براسي :/
مع ان شعري كثيرر بس احب منظر كثافه الشعر ، سبحان الله مغير الاحوال اول كنت اكره كثر شعري هههههه
وهذا مايحرمني منظر الكثافه ويخلي ملمس شعري ناعم 

- عاليسار حمام زيت من فاتيكا ترطيب عميق
بقولكم وش نوعيه شعري أول شي .. شعري الجذور دهنيه نوعاً ما وشعري عادي ويفي لوتركته ينشف بشكل عادي اما لومشطته مثلاً وخليته بن يصير عادي وتختفي اللفلفات .. اوقات تجيه نفشه لومااهتميت فيه
ترا شعري كان بمرحله المتوسطه وحولها شوشه منفوشه بالعامي ههههههه والله الناس تكذبني للحين يحسبوني مسويه كيراتين 
بس لأني كنت جد مدلعه وراسسسي يابس ولا ابي اي شي على شعري وفقد كل الترطيب ومع الاهتمام تعدل :p
عموماً : احب اللي يرتب الويف فيه ولايلزقه زي ماقلتلكم فوق وهالشي يخلي ملمس الشعر عجيب ولا يلزقه ابد ودي بس امرر ايديني بشعري :$ جد احبه لدرجه ممكن اطلع من الشور وانشفه واستشوره ولايبين ابد انه مافيه كثافه بس صحي .. احب هالنوعيه جداً

بلسمين من ايف روشيه
- اللي عاليسار .. بلسم باميه :) للشعر الويفي ترا كاتبين الملتف ههههه الصراحه أنا سألت الموظفه وقلتلها عن نوعيه شعري قالت هذا جميل وللشعر اللي فيه ويف يرتبها بس انا شفت باميه هه هه ترددت :( بس شميته ولاحسيت انه ريحه باميه ابد واخذته مع الشامبو واستخدمتهم سوا ، حبيييت بجد يرتبون لي الويف تراني اقول ويف واحسكم تتخيلوني بلفلفات كأني مسويته بصالون بالله تخيلتو كذا ؟ ياليت ههههههههه 

- اللي عاليمين بالشوفان للشعر الجاف
طبعاً أنا لي فتره مبعده عن الاستشوار تماماً لي ٥ شهور مااستخدمت الحراره على شعري مواكثر من ٤ مرات
هالبلسم للشعر الجاف ! اخذته بسوي اني ذكيه واستخدمه لما اكون بطلع لأحد وابي شعري حريري على قولتهم هههه
صرت بالشور اربط شعري  فوق بشكل خفيف بوني تيل واسحب الربطه زياده ورا بعد ومن الربطه للاطراف احط هالبلسم يعني بعدت عن الفروه وزياده بعد يارب تكونون فهمتوني .. وجد جد حبيت النتيجه وقت مااستخدم هالبلسم شعري كأني مستشورته بالاستشوار الهوائي بشكل بسيط لو شعرك كله عادي خذيه وبيعجبك بس احس لوجاف بتحتاجين شي ترطيبه اقوى من كذا

من اليسار
- شامبو الباميه من ايف روشيه للشعر الملتف على قولتهم هههههه
خالي من السليكون والبارابين والملونات ، حبيته مع البلسم ولو بستخدمه لوحده احسه ماعليه كشامبو ، بس مافيه هالشغلات يعني كويس للشعر

- شامبو لكل أنواع الشعر وعضوي على قولتهم
ماعليه مافيه شي مميز للأمانه 

- شامبو تريسمي للشعر العادي بترطيب غني


بالبدايه كنت استخدم مثلاً زيوت وشغلات وياربي احسه ماينظفهم ابد
لاحظت بعدين مكتوب عليه يحجز الترطيب ! صرت استخدمه لما مااكون حاطه على شعري شي وحبيته بجد
بس اذا حاطه شي على شعرك انسسسسي ماينظف ابد الا بعد ٥ غسلات ><

- ماسك المكاديميا 
احس من كثر الحكي عنه مليتو والا ؟ ماكنت ناويه اكتب عنه بس حسيت لازم
لأني ادري كثيررر طايرين فيه وحابينه بس احسه حلو لوشعرك جااف جداً اوصابغته وتبين تعالجينه
بس ترطيبه حلو للأمانه بس معاي ماشفت منه عجايب ..

من لش .. احس اكثر منتجين العالم طايحين فيهم من لش :)
- بلسم اميركان كريم 
ذااايبه عند ريحته لومااشوف منه الا ريحته بشتريه وريحته تبقى ايام بشعرك بدون مبالغه بالله بنات اللي تعرف شمعه او زيوت عطريه نفس ريحته تخبرني :$ غير ريحته الجميله يرطب شعري بشكل جمميل بدون التلزيق اللي قلتلكم ههههه
احب ترطيبه جداً لوشعرك جاف ماراح يعجبك ولو شعرك دهني خليك عالاطراف بس انا حبيته جداً

- شامبو بيق
برضو مابقى احد ماحكى عنه ويستاهل بصراحه كل اللي انقال عنه ، اول مره استخدمته خفت بصراحه لأن فجأه شعري صار كأنه امممم ماادري كأنه مطاط هههه مره احساس يخوف لا عاد انا وقتها كنت حاطه كثير .. مااحد قالي تراه بيرغي اذا رجعتي حطيتي مويه مره ثانيه :) وشعرك مبلل حطي بإيدك شوي وافركيه بشعرك عالجذور بشويش وحطي مويه مره ثانيه شوي وبيرغي .. وقتها عاد كملي غسيل شعرك بشكل عادي
احس كل انواع الشعور بتحبه بس اللي تحتاج ترطيب ترطبه بعد هالشامبو سواءاً ببلسم عادي او ببلسم شديد الترطيب لوشعرك جاف .. بس جد جد ينظف الشعر وبقولكم متى وقعت بغرامه لشوشتي جد تحت :)

- زيت جدايل من عبدالصمد القرشي
انا حالياً قلتلكم احاول اركز اهتمام بشعري وابيه يطول بصراحه حول ٤ انش وسمعت عن هالزيت انه يطول وتحمست مره اجربه واستخدمته .. ودي انكم تشمون ريحته بس ههههه شيننننه لا وغير كذا مايطلع من الشعر بسهوله ابد ابد هذا هواللي قلتلكم السبب اللي خلاني اعشق شامبو بيق زياده لانه ينظف شعري منه .. غير لونه ! وش يحسون فيه ليه احمر يعني ؟ وترا تشوفون بالمروش المويه حمرا شي عجيب >< الصراحه ماقدرت اكمل عشان كذا مالاحظت هو يطول جد او لا .. اللي جربته ياليت تقولي اذا طول شعرها جد .. لأنه لويطول جد جد الشكوى لله بتحمل وخصوصاً انهم كاتبين عليه انه ساعه وحده تخلينه وتغسلينه يعني ممكن اتحمل ساعه واغسله زين واللي يبي الدح مايقول اح :p 









وبكذا اكون خلصت الجزء الأول من المنتجات اللي خلصتها ..
برجع اكمل باقي المنتجات بتدوينه ثانيه لأنهم جد كثيررر 
نقول هذي رجعتي خلاص ؟ ان شاء الله يارب :$
احبكم ❤