highlight and contour ❤ بالشرح المفصل

السلام عليكم ورحمة الله وبركاته

مين منا ماشفت هالصوره ؟
أو أقل شئ صور تشبه لها !
أنا بصراحه اوقات اتنرفز من هالصوره وخصوصاً اذا حطوها 
وقالو هذا الكونتور الصحيح وسوي كذا :)
* مااقصد انه موصحيح هالكونتور لكن مااحد يحط بحسبانه اختلاف اشكال الوجوه والنتيجه اللي يبغاها كل شخص 

الكونتور والهايلايتر عباره عن ابراز ملامح الجمال اكثر في وجهك
يعني كلنا معالمنا وحده ؟ او غصب نصير نسخه من بعض ؟!! :)

الجمال بكل وجه مااقول هالكلام لأنه الكل يقوله ! بس لأنه جد أنا مقتنعه بهالشئ واشوف الجمال بكل الوجوه اللي تمر علي


بدايه تعريف تعبتو منه اظن بس للفائده
الكونتور : لون اغمق منك بدرجتين يكون اساسه رمادي بس نبعد عن اللي اساسه احمر او اي لون ثاني ويكون مااااااات لازم مايكون فيه اي لمعه 
فيه الكريمي وفيه البودره *
الاغلب يفضل البودره لأنها اسهل بالدمج

الهايلايتر : لمعه فيه بتأثير القليتر وفيه لا طبعاً الافضل بدون عشان يبين طبيعي اكثر
ونفس الشئ فيه الكريمي وفيه البودره

الحين نجي لأي الفرش تناسب للكونتور 
فيه فرش كثير ومتنوعه

فيه هالنوع وهو حلو وبيكون سهل بالدمج 

الفرشه المايله مره سهله وتخدمك كثير

فرشه مثل هالنوع تشبه النوع الاول بس اصغر ومومنتفخه يعني زي الاولى تعطيك تحكم اكثر بالكونتور بس لازم تنتبهين وتدمجين صح
بصراحه هالنوع ماتوقعت بحبه بس صارت فرشتي المفضله 

المنتجات اللي أنا أستخدمها
للكونتور : مات برونز من كلينيك - سهل مررره بالدمج ولا راح يتعب احد 
للهايلايتر : ماري لو من ذا بام او سوفت اند جنتل من ماك 


نجي الحين للزبده بالموضوع 

كلنا نعرف أشكال الوجوه وقبل ماتبدأين معي لازم تكونين عارفه شكل وجهك
نبغى نبرز الجمال بكل شكل

أول نقطه راح اشرح قاعده بسيطه بنمشي عليها

شايفين خط 1 و خط 2 
يمتد الاول من اخر حاجبك والثاني عند الكسره بحاجبك 
وهذا اللي بنمشي عليه بالكونتور والهايلايتر
ممكن نمشي بالكونتور للخط 1 او الى 2
فيه ناس كثير بيجي ببالها انه لوبنسوي كونتور الى الخط 1 بيكون شوي
لاموشوي ابد بس من قدام بيبن خفيف وحلو وبيعطي وجهك تقاسيم بدون مايلعب فيه

شوفو هنا واقف الكونتور عند نهايه الحاجب
بس بوريكم انه موشوي ويأثر مره مولازم نبالغ عشان تطلع لنا نتيجه حلوه :)
* بالصوره الاولى مبين كأنه ممتد بس تراه الدمج والا الخط واقف عن نهايه الحاجب ;)


نبدأ بالوجه البيضاوي - فيسي :p

شوفي النتيجه اللي تبينها !
وجه كيوت وبرئ و تخلينه عريض حبتين ؟
الكونتور نخليه يوقف عند خط رقم 1 
والهايلايتر عند خط رقم 2 
ترا هالطريقه اسويها هالايام عشان جدتي ماتسويلي محاضره مع الريجيم وتقولي شوفي وجهك ناشف وماشيه معي ههههه

تبين وجهه منحوت وبارزه ملامحك ؟ < وهذا اللي افضله بالعاده 
وصلي الكونتور للخط 2 
والهايلايتر للخط 1 !

بكل الطريقتين لاتنسين جبهتك 
الهايلايتر تحت خط الكونتور مهم عشان مايبين وجهك ناشف وبرز الفك

الدائري 

الكونتور هنا يوقف عند خط 2
أما الهايلايتر عند خط 1
اصحاب هالنوع من الوجوه يحتاجون كونتور بالجبهه
وغالباً برضو عند اطراف الوجه من فوق 

حلو لوتحطين هايلايتر تحت الكونتور بس لوماحطيتي ماراح يبين ناشف ;)


الوجه الألماسي < هو كذا اسمه والا ؟ :p

خط الكونتور يوقف عند 1
وماافضل تسوين هايلايتر فوق بس لوحبيتي لايتعدى خط 1 برضو
تحتاجين كونتور اطراف الوجه زي موواضح بالصوره عند نهايه الحاجب بس تحت
برضو تحتاجين بالجبهه
اكبر خطأ ممكن تسوينه تحطين هايلايتر تحت الشفه
حطي هايلايتر تحت الكونتور الى خط 2 عشان يعطيك عرض شوي

الوجه القلبي 

اصحاب هالنوع غالباً عندهم كونتور طبيعي جميل ماشاء الله < اختي من هالنوع 

خط الكونتور يوقف عند خط 2 او حتى 1 اختيارك وتفضيلك
الهايلايتر فوق عند خط 1 وتحت الكونتور عند 2 
غالباً هالنوع عندهم عرض بأطراف الجبهه يبغالها كونتور
موكل اصحاب هالنوع عندهم جبهه كبيره بس تكون عريضه بالغالب
لوكانت كبيره بمعنى على فوق سوي كونتور على اطراف الشعر من فوق

الوجه المستطيل او المربع < ماشاء الله انا بصراحه اشوف هالنوع من اجمل الاشكال - الفك بارز بشكل جميل 

هالفيس بنظري له طريقتين 
للي يحب يبرز الفك بشكل يخقق 
وهي اللي مبينتها بهالصوره

توصلين خط الكونتور لعند 2 
وتسحبينه لتحت شوي 
الهايلايتر يكون فوق الكونتور لعند 1 وتحت الكونتور على الفك لعند 2 
وكونتور على اطراف الوجه من فوق 

يمكن تشوفون الطريقه غريبه بس صدقوني بتطلع تجنن 

مشهوره بهالطريقه بالكونتور هالمزيونه 

شايفين كيف !

لووجهك مربع عالاغلب ماعندك جبهه بس يبغاله تسوين كونتور على اطراف الوجه من فوق
ويبغالك هايلايتر تحت الشفايف

اما لووجهك مستطيل عالاغلب يبغالك كونتور بالجبهه



فيه الطريقه الثانيه 

لوكنتي ماتبين تبرزين فكك < ماادري مين عندها هالنعمه وتبي تخفيها :/ بس قلت اذكرها

الكونتور يمتد لحتى 2 ويكون نازل تحت بعد يعني عريض لتحت
الهايلايتر فوق الكونتور بس لعند 1
والكونتور فوق على اطراف الجبهه زي ماقلنا فوق


الوجه الطويل

غالباً اصحاب هالوجه يبغون وجههم يبين اعرض

خط الكونتور يمتد لعند 1 
والهايلايتر فوق وتحت الكونتور لعند 2
وكونتور بالجبهه { عالاغلب لووجهك طويل عندك جبهه }
نفس الوجه القلبي اكبر غلط تسويه تحطين هايلايتر تحت الشفايف



وكذا نكون خلصنا من اشكال الوجوه وكل وجه الكونتور اللي يناسبه ;)
ادري ناس كثير بتقول طيب انا وجهي مثلاً طويل ومابيه يضعف ليه هالشقى ؟ مااسوي كونتور من الاساس !
مومشكله كيفك ترا بس بيطلع وجهك *فلات* كأنك صافقه بجدار ووجهك بمستوى واحد 

نجي لكونتور الخشم 

سهل سهل وصدقوني بتعجبكم النتيجه

اكثر شئ يعصبني اللي تسوي كونتور بهالطريقه

^ بنشرح على خشم هالمسكينه :D

وبعدها تبدأ تدمج ، وش بتدمجين بس !
بعد ماتدمجين بتصيرين كأنك حاطه برونز على خشمك وبيبين اكثر بوجهك وموهذا اللي نبيه 

اول شئ نجي لأهم شئ 

شايفين المنطقه اللي حاطه عليها دائره !
مهما كان عرض خشمك هالمنطقه هي اضعف منطقه بخشمك
بس لوخشمك كله على نفس الضعف عادي ابدأي منها

نبي نرسم خطين ضعاف كل خط بجهه وبالنص هايلايتر
وبعدين بشويش ادمجيه لتحت { تحت هنا اقصد اطراف الخشم موتحت لبدايه الخشم }
يعني اللي بيوصل لتحت مجرد شئ بسيييط من اللون 
ولاتنسين طبعاً تدمجين الهايلايتر
واهم نقطه !
الكونتور لا يوقف ببدايه المكان اللي قلنا عليه !
نبي ندمجه لتحت الحاجب لأنه هنا بدايه الكونتور الطبيعي وبيكون شكلك مره طبيعي
اكبر غلط تدمجينه مع الحاجب !!


زين لو كان خشمك مايل ؟
ارسمي خط مستقيم يعني لاتمشين مع ميلانه

لوكان طويل حطي كونتور على اول خشمك 
اما لوكان قصير حطي هايلايتر خفيف على اول خشمك < احب هالطريقه احسها تخلي شكل الخشم كيوت 

اهم شئ انتبهي وادمجي حتى الهايلايتر ادمجيه زين !
مويصير كأنه نقطه او خط يلمع ! نبيه طبيعي


وبكذا نكون خلصنا 
* لاتعلقون اني حاطه الهايلايتر ذهبي بالصور بس لأن الخلفيه بيضا الشكوى لله :p
ترا كله اجتهادات شخصيه ومن التخبيص بوجيه الاوادم :$

أتمنى يكون كل شئ واضح و استفدتوا من الشرح
ولاتنسون الاشتراك بمدونتي :$