Colour Crush Nail Polish .. The Body Shop ❤

السلام عليكم
شرايكم فيني وانا كلي حماس ؟ لاتتعودون طيب على كذا ههههههه
قبل فتره شفت اموله بتويتر حاطه عن مناكير بودي شوب وانها بتنزل قريب وفيه كم لون جداً حبيتهم وتحمست لهم
عاد سألتها قالت بتجي هالويكند ان شاء الله وانا امس بالسوق جيت بسأل متى تنزل عندنا من الحماس ههه قالت يوه توها اليوم العصر نزلت ! يااااسلاااام الحمد لله موبالعاده حظي حلو كذا ❤
قعدت احوس بالالوان وكنت ابي ألوان للشتا قلت الصيفيه لاحقه عليهم وفيه كم لون كنت حاطه عيني عليهم من الصور


أنا أخذت ٤ ألوان 
خلوني اوريكم وش اخذت ...

Crazy For Blue
كحلي كحلي مايمزح ههههه حلو بالايد مايبين اسود من بعيد لا مبين كحلي خالص ماعندي هاللون وتحمست له

Gorgeous Grey
رمادي فيه تكه بني وبأندرتون موف بالتصوير طالع بني >< احب هالدرجات اعشقها ماادري ليه
شوفو هنا السواتش انا طالع بإيدي اكثر على موف ... الحين حاطته مبسوطه عليه :p

Mint Cream
هاللون كاتبين مينت وبكل السواتشات اللي شفتها طالع مينت من جد .. حتى بالعلبه
الا بايدي طالع سماوي وفيه نتفه مينت بس لما حطيته بالمحل حبيته برضو وصح انه لون صيفي بس حبيته ماقدرت مااخذه .. ماادري عشان لون بشرتي واندرتوني او كلنا احنا العرب بيطلع بايدنا كذا ! روحو جربو علموني وش بيطلع معكم :p

هذا اقرب سواتش لقيته وبرضو بايدي طالع سماوي اكثر ماادري وش المشكله :/

Hemp Over Heels
هاللون غريب خردلي على اخضر ماادري ماادري ماعرفت اوصف هههه .. ادري انه غريب بس من شفته بالصور وانا حابته ❤
يوم رحت المحل وحطيته مره محلي ايدي وشكله غريب بس مواللي بوووم هههه

هم عباره عن ٢٤ لون وسعر الواحد ٣٥ ريال .. فيه كم لون تحسفت مااخذتهم صراحه هههه مثل the body shop green و deeply in love و rosy cheeks و meet me at dusk  .. اصلاً افكر احوش عالبقيه كلهم قريب :p
اكثر ماعجبني فيهم كلهم لمعتهم عجيبه وقوامهم ثقيل وهالقوام بالعاده ماينشف بسرعه بس كلها ٧ دقايق وناشفين تماماً تماماً .. عموماً حبيت القوام واللون يبين من اول طبقه .. بعضها اصلاً مايحتاج الا طبقه وحده زي crazy for blue والباقي طبقتين يكفون وزياااااده



ايش عجبكم من الالوان ؟
ولوجربتو المناكير علموني برأيكم فيهم وايش اخذتو ألوان
شاركوني على Twitter و Instagram  

بحفظ الرحمن